قصيدة بعنوان {حفلة إعتزال}للشاعر سامح هلال
{حفلة إعتزال}
لملمت نفسي وحسبتني
طلع الحساب ناقص كتير
ما بين تاريخ فات وانقضى
وبين سنين من غير مصير
عاش "العشم" جوايا ثابت "كالوتد"
خاني العشم طلع العشم ملوش ضمير
جمعت السعادة والفرح
وسنين كتير قلبي إتجرح
وبدأت طرح
ملقتش غير أحزان وجرح
قلت الحساب أكيد غلط
فرجعت تاني وحسبتني ملقتش فرح
فنداء لكل "الممكنات" .. الوقت فات
وانتم لسه مزورتونيش
والمستحيل "سد حاصين" رافض يلين
وأنا حلمي بسيط ونفسي يعيش
أحلامي مهما زاد حجمها أو نقص
ركنتها على رف "نيش"
والممكنلات أشباه بتختفي من حياتي
والمستحيل "أشباح" بتزورني ليلاتي
وكأني معمولي عمل إن الخطاوي
تنتهي .... ومتبتديش
"ترسانه" من الصعاب قدامي
المستحيل واقف قصادي وكأنه "جيش"
مش قاعده ثابته إن الحياة مليانه فرص
ناس كتير عمرها عدى مفيش
وشكلي واحد منهم .. مع إن أصلا كلهم
عاش العشم يقولهم .. بكره نعيش .. بكره نعيش
والعشم واقف بعيد بتقول إيه ياخال
لسه فيه مليون ألف إحتمال
للحلم يوصل للكمال
بطل تبيع أوهام
"المستحيل" في زمنا أصبح إحتلال
و"الممكنات" من ضعفها بقت شبيها بالمحال
مش هسمعك بطلت تاني أصدقك إنت خيال
ضيعت حالي وأنا بسمعك
بطل نضال
فنصيحة مني للجاي الحلم أصبح مستحيل
مافيهوش ... فِصال
وبعد ماتحسب حسبتك
هتلقى نفسك خسران كتير
مجرد شخص ملوش مصير
أصبحت "صفر على الشمال"
فلذالك أنا بعلن قرار فوري
بدون تأخير ولا تأجيل
ولا هسرد كتير تفاصيل
عن الأحوال
من شخص أصبح كنيته "سالب"
وصفر على الشمال
كان نفسي أعيش بس الحياة
عملتلي "حفلة إعتزال"
الشاعر سامح هلال